Maty notapahin-doha tany Betsingala, distrikan’i Mampikony, afakomaly tamin’ny 7 ora sy sasany hariva, ny ankizilahy 11 taona, manana toe-tena varira. Tao an-trano izy sy ny zaodahiny iray tamin’io fotoana io. Nisy olona telo, nisaron-tava sy nirongo zava-maranitra (toy ny antsy sy famaky), tonga sy niditra an-keriny tao an-trano. Vantany vao tafiditra, notapahin’ireo olon-dratsy tamin’ny antsy avy hatrany ny lohan’io ankizy varira io. Ankoatra izay, raim-pianakaviana iray hafa ihany koa nokapain’ireo olon-dratsy tamin’ny famaky, nandritra izany. Nikasa hiaro ilay ankizy varira novonoin’ireo olon-dratsy izy no voavely tamin’ny famaky. Niezaka nitsoaka ity farany ary nampandre ny fokonolona tany an-toerana. Nentin’ireo olon-dratsy ny lohan’io ankizy io rehefa vita ny asa ratsiny. Lasa nitsoaka avy hatrany izy ireo, taorian’izay. Vory lanona haingana teny an-toerana nitrangan’ny loza ny fokonolona vantany vao nahare ny zava-nisy. Tsy mbola nisy tranga tahaka izao tany amin’ity distrika ity, raha ny fazanavan’ireo mponina any an-toerana.
Voasambotra afakomaly alina ihany
Nidina nijery ny zava-misy sy nanao ny fanadihadiana ny polisim-pirenena avy amin’ny CSP Mampikony. Natao ny fikarohana ireo nahavanon-doza, taorian’izay. Napetraka ny sakana sy fisavana ireo fiara sy olona rehetra nivezivezy tany an-toerana. Tsy niandry ela, fa voasambotra ny lehilahy iray, tompon’antoka tamin’io vono olona feno habibiana io. Nialana amin’ny fitsaram-bahoaka mety ho niseho, natolotra ny fampanoavana omaly ny raharaha ary naiditra vonjimaika am-ponja ity farany. Mbola misy olona roa hafa niray tsikombakomba tamin’ny vono olona karohina amin’izao fotoana izao. Manao antso avo hijerena akaiky ity raharaha ity ny filohan’ny fikambanana Albinos Madagascar.
Mino
French