Namoy ny ainy rehefa niezaka namono tena indroa nisesy ny raim-pianakaviana iray teny Ambodimita, boriborintany fahenina, omaly. Efa hitan’ny mponina manodidina naneho fihetsika hafahafa teny an-toerana io lehilahy io. Niezaka namono tena izy saingy nisy nahatsikaritra ka voasakana. “Saika hitsoraka tany ambany kodiaran’ny fiara nandalo izy. Nanavotra azy ny fokonolona”, hoy ny fanazavan’ny nanatri-maso. Tsy nionona tamin’io fanavotana azy io anefa ilay lehilahy. Nanita-kevitra tampoka izy ka nihazo ny fefiloha. Nitsoraka tao anatin’ny rano ary tsy nipoitra intsony. Nitangorona ireo mponina manodidina nitazana an’io lehilahy io saingy tsy hita intsony izy. Niantso ny manam-pahefana ireto farany. Natao ny fikarohana saingy efa vatana mangatsiaka sisa nakarina tao anatin’ny rano. Tsy fantatra mazava ny nitarika ny famoizam-po ka nandrisika an’io lehilahy io hamono tena. Maro ireo tranga famonoan-tena. Fahadisoam-panantenana manoloana ny fiainana, amin’ny ankapobeny, no mandrisika ireo olona hanaotao foana tahak’izao.
Tsiferana R.
French