Nambanan’ny jiolahy miisa efatra tamin’ny fitaovam-piadiana, voatery nanome ny vola rehetra tao an-tsena niampy ny vola vao nalaina tany amin’ ny banky, ny lehiben’ny Zap Fierenena, tao amin’ny fokontany Mangarivotra, kaominina Tsiroanomandidy, afakomaly alina. Nanararaotra fahatapahan-jiro ireo mpanao ratsy ka niditra tao an-trano tamin’ny 12 ora sy sasany, ny alin’ny alatsinainy hifoha omaly talata 24 febroary. Nosimbain’izy ireo tamin’ny « barre à mine » ny hidim-baravarana natorian’ izy mivady tompon-trano. Niezaka niantso vonjy ireo lasibatra, saingy tara loatra satria efa tafiditra ny jiolahy. Basy lava miisa roa no nentin’ireo mpanao ratsy tamin’io fotoana io, araka ny loharanom-baovao. Noterena hanome ny vola rehetra ny tompon-trano. Nihidy tany anatin’ny tsena anefa ireo vola ireo ka narahina tamin’ny fitaovam-piadiana avy aoriana ilay raim-pianakaviana. Lasa avokoa ny vola rehetra tao amin’izy mivady. Mpivarotra sady mpanao Cash point ity tokantrano lasibatra ity. Noraofin’ireo tsy mataho-tody avokoa ny finday fampiasa rehetra izay mbola nisy vola tany anatiny. Tsy namelan’izy ireo koa ny firavaka sarobidy. Nanao fanamiana toy ny mpitandro filaminana ireo jiolahy ireo, raha ny fanazavana. Voavely mafy teo amin’ny kibony ilay raim-pianakaviana rehefa nahazo izay nilainy rehetra ireo jiolahy. Tsy nahatsiaro tena io lehilahy io taorian’ny fahavoazany. Tafaporitsaka ka niezaka niantso vonjy ilay ramatoa vadiny, saingy efa lasa avokoa ireo jiolahy.
Tsiferana R.
French