Namoaka ny tatitra momba ireo fananana sy harena azo tamin’ny fomba tsy ara-dalàna ny eo anivon’ny sampandraharaha misahana izany (Arai), omaly. Anisan’ny tsy afa-bela amin’izany ireo olon’ny fitondrana teo aloha.
Manodidina ny 200 miliara Ariary mahery ny vola nogiazan’ny sampandrandraha misahana ny famerenena amin’ny fanjakana ireo harena azo tamin’ny tsy ara-dalàna (Arai). Nivoitra izany tamin’ny tatitra nataon’ izy ireo, omaly, raha ho an’ny taona 2025. Nisongadina, ohatra, fa nogiazan’ny fanjakana ireo fiara miisa 116 sy moto 113 ary tany miisa 80 manana velarana 518 hektara.
Etsy andaniny, momba ny resaka fanodinkodinam-bolam-panjaka sy ny fanararaotam-pahefana kosa, miisa 641 ny fitambaran’ny olona voakasiky ny fampiharana ny didim-pitsarana, ka 41 ireo olona tena nisitraka ireo harena azo tamin’ ny tsy ara-dàlana ireo. « Ny 15% amin’ izany no mpiasam-panjakana, raha 65% kosa avy eny anivon’ny sehatra tsy miankina. Olona akaiky ny mpitondra teo aloha ny ankamaroan’ireo voaenjika amin’ ny raharaha harena azo tamin’ ny tsy ara-dalàna ireo », hoy hatrany ny eo anivon’ny Arai.
Miandry didim-pitsarana ny momba ny filoha teo aloha
Momba ny filoha teo aloha, Rajoelina Andry kosa, nambaran’izy ireo fa mbola miandry ny didim-pitsarana vao afaka hirosoana ny fanagiazana ny fananany. Tahaka izany koa ny Praiminisitra teo aloha, Ntsay Christian, araka ny nambaran’ny eo anivon’ny Arai hatrany.
Tsiahivina fa maromaro amin’ireo mpanao politika no efa nitaky ny momba ny tokony hanenjehana azy ireo. Tsy tokony hijanona amin’ilay mpandraharaha, Ravatomanga Maminiaina, tazonin’ ny fitsarana atsy amin’ny Nosy Maorisy ihany ny fanenjehana raha ny fanehoan-
kevitr’izy ireny.
Synèse R.
French