Ampirisihina ny mpandraharaha malagasy hamorona tetikasa mitondra zava-baovao. Anisan’ny sehatra ifantohana ny fambolena, ny angovo, ny toekarena mihodina, ny tontolo iainana, sns.
Nisokatra nanomboka ny 1 avrily teo hatramin’ny 30 mey ho avy izao, ny fifaninanana Prix Pierre Castel ho an’ny andiany 2026. Miara-mikarakara azy ny orinasa Star sy ny fikambanana Fondation de Dotation Pierre Castel. Natao ho an’ny mpandraharaha malagasy tanora 18 hatramin’ny 45 taona manana tetikasa matanjaka, tia manavao sy mamorona, ahazoam-bokatra miavaka ny fifaninanana. Miantraika amin’ny fambolena sy fanodinana sakafo, angovo azo havaozina, teknolojia vaovao, toekarena mihodina ary fandraharahana misy fiantraikany ara-tsosialy sy ara-tontolo iainana. Natao ho an’ny mpandraharaha na orinasa efa mijoro ara-dalàna, nisy nandritra ny 2 taona farafahakeliny. Atao manerana ny firenena afrikana fito (Alzeria, Benin, Burkina Fasso, Cameroun, Côte d’Ivoire, Madagasikara ary Repoblika Demokratika Congo) ny fifaninanana. Amin’ny alalan’ny internet, ny adiresy http://candidature-prix-pierre-castel.org/ irery ihany ny fisoratana anarana handray anjara.
Tohana ara-bola sy fiofanana
Hahazo tohana ara-bola sy fanampiana stratejika ireo mpandresy. Vola 25 000 euros ho an’ny eto Madagasikara ary 35 000 euros ho an’ny eo anivon’ny samy firenena afrikana. Ankoatra ny fanofanana, hisy ny fampifandraisana anaty tambajotran’ny mpandraharaha sy mpiara-miombon’antoka, hampahafantarana ny orianasa sady ahafahany manitatra ny ambaindahiny.
Tanjon’ny Vondrona Castel mikarakara ity fifaninanana ity ny hanomezan-danja ny famokarana eo an-toerana isaky ny firenena voakasika, hanatsarana ny rafitra ara-tsakafo, misy akony ara-toekarena, ara-tsosialy ary ara-tontolo iainana, azo refesina. Tafiditra ao anatin’ny Fandraisana andraikitra ara-piarahamonina (RSE) ataon’ny Star.
Njaka Andriantefiarinesy
French