Mpanoratra telo isaky ny sokajy nifaninanana no nivoaka mpandresy. Natolotra omaly ny lokan’ireo voalohany tamin’ny fifaninanam-pirenena « Literatiora 2024 ».
Rijamamy Rakotondrasoa Joseph, fantatry ny maro amin’ny solon’anarana Rija-Al-Jonah. Izy no nandrombaka ny laharana voalohany teo amin’ny sokajy tantara foronina, tamin’ilay fifaninanana «Literatiora 2024». Ilay tantara «Mena mirahavavy» no nentin’ity mpanoratra efa fanta-daza mpikambana amin’ny Faribolana Sandratra ity nandresy lahatra ireo mpitsara ny fifaninanana. Notontosaina omaly ny fanolorana ny loka ho an’ireo mpandresy tamin’ity fifaninanana ity. Nandritra ny lanonana nanokafana ny fankalazana ny fetin’ny Fahaleovantena tetsy Analakely izany, izay sady fanamarihana ny fanombohan’ny Iray volan’ny teny malagasy ihany koa.
Teo amin’ny sokajy amboaran-tononkalo, nisongadina tamin’ny maro i Lanto Raozy, na Rahariniaina Mamiharilanto Léonie. « Adintsika iombonana » no lohatenin’ny sanganasan’ity mpanoratra avy any Ambositra ity. I Anakandriamaso, na Randriamarosolo Marcellin Yrris kosa no nahazo voalohany tamin’ny sokajy tantara an’onjampeo, tamin’ny alalan’ilay sanganasany, «Vokatra isan-taona».
Notolorana loka lelavola 1 tapitrisa Ar i Anakandriamaso, raha toa ka nahazo loka fanontana ny boky 500 isa avy i Rija Al-Jonah sy i Lanto Raozy. Mbola nomena loka ihany koa ireo laharana faharoa sy fahatelo isan-tsokajy.
Tsiahivina fa fifaninanam-pirenena natomboka tamin’ny volana jona 2024 ka nifarana tamin’ny janoary 2025 izy ity. Ny minisiteran’ny Serasera sy ny kolontsaina no nikarakara azy, sy nanolotra ny loka, omaly. Nanodidina ny lohahevitra «Ady amin’ny fanolanana» sy «Fandrindrana ny fiainam-pianakaviana» ireo sanganasan’ireo mpanoratra nalefa nifaninana.
Ankoatra ity lanonana fanomezana loka ireo mpandresy tamin’ny fifaninanana ity, nisy koa ny seho maroloko, teo Analakely. Mifandray amin’ny tantaram-pirenena avokoa ireo sanganasa nasehon’ireo mpanakanto sy ireo mpianatra izay nandray anjara.
Zo ny Aina
French