Voahaja ny lojika! Tsy nahatohitra ny ekipan’ny Lion de l’Atlas Maroc ny Barean’i Madagasikara, omaly, tao amin’ny Kianjan’i Moulay Abdellah, Rabat Maroc. Nomontsanin’ny ekipa nasionaly maraokanina, tamin’ny isa 4 no ho 0, ny Barea. Raha hiverenana kely ny fifanandrinana, nanindry tanteraka tamin’ny lafiny rehetra ny Maraokanina, na teo amin’ny fanafihana na teo amin’ny fitazomana baolina. Nosahiranin-dry Ismael Saibari, lohalaharana maraokanina, mihitsy ny vodilaharana malagasy teo amin’ny fidirana voalohany, ary izy no nampiditra an’ireo baolina roa ireo, ny fahefatra minitra nilalaovana sy ny faha-24 minitra. Io isa 2 no ho 0 io no nentin’ny roa tonta niala sasatra. Teo amin’ny fidirana faharoa, mbola nitohy hatrany ny fampisehoana nataon’ny maraokanina. Teo amin’ny fidirana faharoa, mbola nanakobana ny harato indray ny Maraokanina tamin’ny alalan’ny penalty, minitra faha-78 nodakain’i Rahimi. Mbola nanampian’i El Kaabi teo amin’ny minitra faha-87 Nahazo tsapa taorian’iny fihaonana iny avokoa izany ny mpilalaon’ny Barea. Tsikaritra ihany koa fa nisalotra ny akanjo manga ny ekipam-pirenena malagasy teny ambony kianja. Raha ny filazan’ny Federasiona malagasin’ny baolina kitra (FMF), io no fanamiana fahatelo ho an’ny ekipa nasionaly malagasy. Tsiahivina fa ny 8 jona ho avy izao, mbola hifandona amin’i Oganda indray ny ekipam-pirenena malagasy, any Maroc ihany.
Fitia Randria
French