Nolanian’ny filankevitry ny minisitra ny zoma teo ny fanaovana fitafy maha Malagasy isaky ny zoma. Ao anatin’izany ireo fitafy mampisongadina ny maha izy azy ara-kolontsaina na mampiavaka ireo faritra samihafa eto amin’ny firenena, na nentin-drazana izany na nohavaozina izany, araka ny tatitra. Anaty fanajana ny hasin’ny asam-panjakana izany.
Voatendry ho masoivohon’i Madagasikara eo anivon’ny Unesco, Razanamahasoa Christine. Hisahana izany asa izany any Paris, Frantsa araka ny tatitry ny filankevitry ny minisitra, ny zoma teo. Tsiahivina fa efa minisitry ny Raharaham-bahiny, tamin’izao fitondrana Fanavaozana izao ny tenany. Vehivavy voalohany, efa filohan’ny Antenimierampirenena koa.
Laharam-pahamehana ny fampiroboroboana ny fiainan’ny tanora, araka ny nambaran’ny Praiminisitra, Rajaonarison Mamitiana, ny herinandro teo. Nandray ny sekretera jeneralin’ny Confejes eo anivon’ny Frankonfonia, Thobi Louisette – Renée teny Mahazoarivo ny tenany tamin’izany. Voaresaka ny fanamafisana ny fiaraha-miasa momba ny tanora.
Tokony nisy fifampiresahana politika namondronana ireo hery rehetra nandrafetana tondrozotra raha vao nijoro ny fitondrana Fanavaozana, araka ny fanehoan-kevitry ny depiote, Rajerison Antoine. « Sivy volana nijoroana ny fitondrana fa mbola tsy misy dingana vita momba ny fikandoham-pirenena noho ny tsy fisian’ny drafitra mazava », hoy izy.
French