Ho famahana ny olana sedrain’ny orinasa Jirama, nisy ny valandresaka ho an’ny mpanao gazety, omaly, teny amin’ny Lapan’i Tsimbazaza. Niompanan’ izany ny mahakasika ny fanadihadiana ataon’ny depiote. Nitarika izany ny filohan’ny Antenimierampirenena, Randrianasoloniaiko Siteny sy ny filohan’ny Vaomiera mpanadihady mahakasika ny orinasa Jirama, Rakotoniaina Pety. Nanotrona azy ireo mpikambana ao amin’ny Vaomiera. Nohamafisin’ny mpandaha-teny ny fisian’ny tatitra sy fampahafantarana homena ny vahoaka malagasy momba ny fandrosoan’ny fanadihadiana.
Efa nisy ny dingana natao. Hita tamin’izany ny fifanaraha-piaraha-miasa eo amin’ny Jirama sy ny mpandraharaha tsy miankina izay tsy ara-drariny. Nandritra ny valo taona ny tsy fahatomombanana, araka ny voalaza. Anisan’ny nanimba ny orinasa Jirama sy tsy mifanaraka amin’ny tombontsoam-bahoaka izany.
Hisy ny fidinana ifotony hanaovan’ny vaomiera fanadihadiana eny amin’ny toerana famokarana sy famatsiana herinaratra manerana ny Nosy. Hatomboka any Antsiranana, hiitatra amin’ny toerana 47 voafaritra hanaovana fanadihadiana izany. Nampitandrina amin’ny fampihorohoroana mety hiseho mandritra ny fanaovana ny fanadihadiana ny filohan’ny Antenimierampirenena sy ny filohan’ny Vaomiera mpanadihady mahakasika ny orinasa Jirama.
Andry F.
French