Manoloana ny fihanaky ny areti-mifindra maneran-tany manao fanazaran-tena ny eny amin’ny seranam-piaramanidina, Ivato. Nisantarana izany ny fitantanana tranga ahina ho aretina Ebola.
Nandray anjara tamin’ izany ireo mpiantsehatra rehetra eny anivon’ ny varavarana fidirana iraisam-pirenena, izay maharitra hateloana. Nandritra ny andro voalohany, nisy ny fanomanana niarahan’ireo mpiantsehatra sy ireo sampandraharaha rehetra voakasika. Handrindrana ny fomba fiasa, ny fandaharam-potoana rehetra mifanaraka amin’ny hetsika izay hatao ary hanazavana ny andraikitry ny tsirairay mandritra ny fanazarantena. Nampahafantarina koa ny aretina Ebola amin’ny ankapobeny sy ny antony hanaovana izao fanazarantena izao, izay takin’ny fenitra iraisam-pirenena (Règlement sanitaire international – RSI).
Ankoatra izay, mitohy ny ezaka fanamafisana ny fahaiza-manaon’ireo mpiasan’ny fahasalamana eo anivon’ny sisintany fidirana Ivato, ataon’ny minisitera, ho fiarovana ny fahasalaman’ny vahoaka sy ireo mpandeha miditra sy mivoaka eto Madagasikara. Ny seranam-piaramanidina Ivato no varavarana voalohany idirana eto Madagasikara. Mitana andraikitra lehibe, noho izany, ireo mpiasa amin’ny fisorohana sy fanaraha-maso ny fiparitahan’ny areti-mifindra, anisan’izany ny Mpox sy ireo aretina hafa mety hampidi-doza amin’ny fahasalamam-bahoaka.
Ho fanamafisana, notanterahina ny fanofanana momba ny vonjy aina sy ny fandraisana an-tanana maika, izay fiaraha-miasa amin’ny IOM Madagascar & Comoros. Mikendry ny hanatsara ny fahaizan’ireo mpiasan’ny fahasalamana izany. Niompana tamin’ny famantarana mialoha ireo tranga maika sy mampiahiahy, ny fandraisana andraikitra haingana, mahomby ary azo antoka ny fanofanana. Nanampy ireo ny fitantanana ireo toe-javatra vonjy taitra eny amin’ny seranam-piaramanidina, araka ny fenitra ara-pahasalamana.
Vonjy
French