Nosokafana tamin’ny fomba ofisialy tao Vohipeno, afakomaly, ny fanombohana ny asa sosialy ataon’ny fikambanana Fanjiry. Tao amin’ny Kianjan’i Tsiafaranolo, kaominina ambanivohitr’Andemaka, 25 km miala ny tanànan’i Vohipeno, no nosafidin’ity fikambanana tarihin’ny filoha mpanorina, Randrianirina Elisa, ity hanaovana ny hetsika fanokafana ny asa ho an’ireo vahoaka sahirana. Hita ao anatin’io fikambanana misehatra amin’ny asa sosialy io avokoa ireo vadin’ny mpanolotsaina avon’ny Fanavaozana, ny Jly Zafitasondry Marcellin, ny Kly Rampanarivo, ny Kly Gervais. Eo koa ny vadin’ny Praiminisitra lehiben’ny Governemanta ary ireo minisitra vehivavy rehetra. Nambaran-dRamatoa Rampanarivo Georgette, fa ny fikambanana Fanjiry dia miezaka manakaiky ny vahoaka sady miahy sy mitsinjo ireo any ambanivolo ary mijery manokana ireo ankizy marefo.
Nomarihin’ny vadin’ny mpanolotsaina avon’ny Fanavaozana hatrany fa misy ankizy 128 isa, manodidina ny
3 ka hatramin’ny 14 taona, no karakarain’ny masera ao amin’ny Akany Ambohimanantenasoa. Anisan’ireo sehatra hiasan’ny fikambanana rahateo ity ivontoeram-panabeazan-dry masera ity.
Marihina fa mifantoka amin’ny sehatra telo lehibe ny asa sosialy ataon’ny Fanjiry: ny fahasalamana, ny fanabeazana, ny fivelomana (fambolena sy fiompiana) izay ahitana ny fandraharahana, ho fampananana asa.
Tatiana A
French