Nitsidika ny distrikan’ Amboasary Atsimo ny minisitry ny Foloalindahy (MFA), ny Jly Razafitombo Mamitiana Ely, ny minisitry ny Fahasalamam-bahoaka, Managna Monira ary ny minisitra Delege misahana ny zandarimariam-pirenena, ny Jly Bama Marima. Nifantoka tamin’ireo laharam-pahamehana momba ny fiainan’ny vahoaka sy ny fampandrosoana ao an-toerana ny fitsidihana. Anisan’izany ny fanamafisana ny ady amin’ ny tsy fandriampahalemana. Nohamafisina, araka izany, ny ezaka sy ny fiaraha-mientan’ ireo tomponandraikitra amin’ ny famerenana sy fitazonana ny filaminana sy fandriampahalemana mba hahafahan’ny vahoaka miaina am-pilaminana sy mampandroso ny Faritra. Teo ihany koa ny fametrahana ny “Dinan’ny Anôsy Miray” izay nifantoka tamin’ny fanamafisana ny firaisankina, fifanajana ary fiaraha-mientan’ny mponina, ho fototra iray lehibe amin’ny famahana ireo olana sy fanamby sedrain’ny faritra. Eo amin’ny sehatry ny fahasalamam-bahoaka kosa, nodinihina manokana ny fanatsarana ny tolotra ara-pahasalamana sy ny fahafahan’ny vahoaka mahazo izany. Ankoatr’ireo, misy koa ireo fitaovana sy fotodrafitrasa ampiasaina amin’ny sehatry ny filaminana sy ny fahasalamana mba hamantarana ireo filana sy fanatsarana tokony hatao. Niara-nanotrona izany fitsidihana izany ireo Solombavambahoaka voafidy tao amin’ny distrikan’Amboasary Atsimo, Rakotonirina Richard sy Andriamamonjy Olivier du Mamou, niaraka tamin’ny lehiben’ny Faritra Anôsy, Randrianarivo Bertrand, ny lehiben’ny distrikan’Amboasary, Madina Emilien, ireo ben’ny Tanàna eo anivon’ny distrika ary ireo manamboninahitra ambony, sivily sy miaramila.
Jean Claude
French