Manana karazan-bary maro i Madagasikara. Mifanaraka amin’ny toetry ny tany sy ny faritra tsirairay ireo karazany ireo. Harena lehibe ho an’ny famatsiana sakafo sy ny toekarena izany.
Mila asandratra ho fototry ny vokatra eny an-tsena ny vary malagasy na ny vary zanatany miohatra amin’ny vary hafa, toy ny vary afarana. Hevitra anisan’ny asongadin’ny « Saga du Riz Malagasy » izany. Antontan-kevitra manasogadina ny karazam-bary malagasy, notontosain’ny minisiteran’ny Fambolena sy ny fahaleovantena ara-tsakafo (Miasa) izy ity. « Tsy tokony hatao safidy faharoa intsony ny vary eto an-toerana », hoy ny mpanoratra. Mampiavaka ny vary malagasy ny fahasamihafan’ny toeram-pamokarana. Anisan’ny sompitra mamokatra betsaka, ohatra, ny faritra Betsileo, Alaotra, Boeny, Vakinankaratra, Menabe na koa Sofia. Misy fiantraikany amin’ny vary vokarina ny tany, ny rano ary ny toetr’ andro. Misy koa ny fomba fambolena hampiharina eny an-tsaha. Izany no mahatonga ny tsiro sy ny endriky ny vary hiovaova. Maro ny karazam-bary toy ny vary mena sy vary manitra ary vary malemy na mafimafy. Samy manana ny fampiasana azy eo amin’ny sakafo ireo karazany ireo.
« Tsy mitovy avokoa ny vary rehetra », hoy hatrany ny Saga.
Mpanjifa
Mila ampahafantarina bebe kokoa ny mpanjifa ny niavian’ny vary. Mametraka ny antontan-kevitra fa tokony hazava amin’ny fonosana ny karazany sy ny faritra niaviany. Hanamafy ny fahatokisan’ny mpanjifa izany. Manana anjara toerana lehibe amin’izany ny tantsaha. Izy no mifehy ny masomboly, ny rano, ny fambolena ary ny fijinjana. Izy ihany koa no miandraikitra ny fitahirizana. « Ny mpamboly azy no ambasadaoro tsara indrindra amin’ny faritra niaviany », hoy ny fanazavana. Afaka manasongadina ireo karazam-bary ireo ny trano fisakafoana sy ny hotely. Afaka mampiroborobo azy koa ny mpahandro amin’ny alalan’ny fomba fahandro nentim-paharazana. Tafiditra ao anatin’ny tolokevitra ny famoronana marika iombonana
« Riz du Terroir ». Hiantoka ny fiaviana, ny karazany ary ny kalitaon’ny vokatra izany. Marihina fa hanohana mivantana ny tantsaha ny fividianana vary eto an-toerana. Hahafahana mitahiry ny fahaiza-manao sy mampatanjaka ny toekarena eny ifotony.
Henintsoa
French