Namaly ny fanontanian’ireo parlemanta afrikanina momba an’i Madagasikara ny filohan’ny SADC. Nambarany, tamin’izany, fa ny samy Malagasy ihany no hanao ny dinika nasionaly.
Niankina tamin’ny fanapahan-kevitry ny Fitsarana avo momba ny lalàmpanorenana (HCC) malagasy ny SADC, araka ny valintenin’ny mpitarika ny SADC sady filohan’i Afrika Atsimo, Matamela Cyril Ramaphosa, tamin’ny parlemanta afrikanina tatsimo nanontany ny toe-draharaha eto Madagasikara, tao Cap Town, taorian’ny namoahan’ny FFKM ny tetiandro hanatanterahana ny dinika nasionaly ho fanarenana an’i Madagasikara, tamin’ny 25 aogositra lasa teo. Nekena ny fahabangan-toerana teo amin’ny filohan’ny Repoblika amin’ny fitantanam-panjakana teto Madagasikara, taorian’ny fialan’ny filoha teo aloha. Koa ny filohan’ny Fanavaozana amin’ izao no nandray izany andraikitra izany.
Rehefa nanombana ireo dingana efa natomboka sy ny mbola fanohizana izany ny SADC, nihevitra fa tokony hanohana ny dingana. Efa nisy rahateo ireo fanaraha-mason’ny olobe iraka manokan’ny SADC teto an-toerana. Tamin’izany no nahitana fa mitondra mankany amin’ny fanavaozana na fanorenana indray ny Repoblikan’i Madagasikara ny dingana atao sy mbola hatao. Ao anatin’izany ny tetiandro sy ny sori-dalana hirosoana amin’ny fifampidinihana nasionaly. Nanaraka tsara ireo fepetra takin’ny SADC ny manampahefana malagasy nanolotra ny tondrozotra na ny tetiandro hiverenana amin’ny lamina araka ny lalàmpanorenana. Mampiseho izany fa misy ny fahamatorana eo amin’ny governemanta hiroso amin’ny fanatanterahana ny dinika nasionaly ho fanavaozana an’i Madagasikara. Tsy maintsy ny samy Malagasy ihany no hitarika sy hanatanteraka an’izay. Ho voafetra amin’ny fanomezana fanohanana ara-pitaovana sy fanangonana vaovao eny ifotony ary fandefasana ny vondron’ny olobe ny anjaran’ny SADC. Ny hampanjakana ny filaminana sy ny fampihavanana no tanjona.
R. Nd.
French