Miomana amin’ny fiatrehana ny fifanintsanana hiadian-toerana ho an’ny Can 2027, sokajy U23, ny Barean’i Madagasikara. Efa voatendry ireo mpanazatra hisahana izany. Ho an’ny mpilalao eto an-toerana, i Hery Be ary ny an’ireo any ivelany kosa hataon’i Boualem Mankour.
Voatendry ny alakamisy lasa teo Rabearisoa Herimanitra (Hery Be) sy i Boualem Mankour, izay hanazatra ny Barean’i Madagasikara U23, amin’ny fanomanana ny fifanintsanana hiadian-toerana amin’ny fiadiana ny ho tompondakan’i Afrika (Can 2027). Nampahafantatra izany ny komity misahana ny ekipam-pirenena zandriny, tarihin-dRaharijaona Solonirina sy Ralison Herinirina Jacques Landry (Néné), izay nomen’ny Federasionina malagasin’ny baolina kitra fahefana.
Mizara roa miavaka tsara izany ka hisahana ny mpilalao avy eto an-toerana, i Hery Be sy Razafindrakoto Mamisoa. Hikarakara ireo mpilalao milaravinahitra any ivelany kosa i Boualem Mankour sy i Johan Paul. Hiandraikitra ny fanazarana ny mpiandry tsatoby, i Melvin Adrien, izay efa mpilalao tao amin’ny Barea nandritra ny Can 2019, tany Egypte.
Tsiahivina fa efa nitondra ny Barean’i Madagasikara U23 ny Coach Hery Be, nandritra ny fifanintsanana hiadian-toerana ho an’ny lalao Olympika 2026, natao tany Paris. Nandresy an’i Seychèlles avy eo lavon’ny Panthères Gabon.
Ho an’ny eto an-toerana, efa nivory ireo teknisianina hisahana izany ary efa nanomboka ny fitiliana ireo mpilalao, izay ao anatin’ny Pureplay Football League (PFL). Ara-drariny izany satria fihaonana iraisam-pirenena io ka ny PFL no hany azo antoka hahitana mpilalao ampy fihaonana.
Marihina fa hikatroka amin’ ny Coelacanthes Comores ny Barea. Ny 28 septambra ny lalao mandroso ary ny 6 oktobra ny fihaonana miverina. Araka ny tsilian-tsofina anefa, niala an-daharana ny kaomorianina ka fanomanana ny lalao faharoa hifandonana amin’i Afrika Atsimo, ny volana novambra izany, ny fampivondronana atao.
Tompondaka
French