Notolorana mari-pankasitrahana momba ny fambolena an-tanàn-dehibe tetsy amin’ny Lapan’ny tanàna Analakely, afakomaly, ireo vehivavy miisa 103. Avy amin’ny fokontany valo eto Antananarivo izy ireo. Nisy ny avy eny Ambodimita, Ambodihady, Andohanimandroseza, Ankazomanga Avaratra, Antetezana Afovoany, Ampefiloha Ambodirano, Ampangabe Anjanakifolo ary Amboditsiry. Fampiofanana nokarakarain’ny ONG Gret, tamin’ny alalan’ny tetikasa Aintsoa izy io. Niarahan’izy ireo niasa tamin’ny Nutrizaza sy ny Kaominina Antananarivo Renivohitra. Tafiditra ao anatin’ny paikady hampiharina entina miady amin’ny tsy fanjarian-tsakafo eto an-dRenivohitra ny fambolena an-tanàn-dehibe. Mbola tratran’ny tsy fanjarian-tsakafo ny 37% ireo zaza latsaky ny dimy taona eto Madagasikara, raha ny tatitra voaray avy eo anivon’ity ONG ity ka antony nitondrana anjara biriky eo amin’ny fiahiana ny tsy fanjarian-tsakafo amin’ireo fokontany eto anivon’ny Kaominina Antananarivo. Mikendry ny hanohana ireo tokantrano marefo ara-toekarena ihany koa ny hetsika. Etsy andaniny, hanampiana ireo fianakaviana mba hahaleo sy hahavita tena ara-tsakafo. Ankoatra ny fampiofanana, notohanana ara-pitaovana entina mamboly ireo vehivavy ireo. Tanjona ny hahatonga ny fambolena an-tanàn-dehibe ho asa tena mampidi-bola sy hahazoana tombony ary ahafahan’ny tsirairay manatsara ny fiainany sy ny fianakaviany.
Mino
French