Vahaolana vaovao ! Mba hanamorana ny fitantanana sy ny fanaraha-maso ny mpianatra ary hanamafisana ny fifandraisana eo amin’ny sekoly sy ny ray aman-dreny, novolavolaina ny sehatra niomerika “Mpianatra”. Raha ny fanazavana voaray, omaly, sanganasan’ny Studio MG izy ity, natao hanavaozana ny fitantanana ny sekoly eto Madagasikara.
Marihina fa mifanaraka amin’ny filan’ny sekoly amin’ny ambaratonga rehetra sy ny ivontoeram-piofanana ity sehatra niomerika ity.
Ahitana sokajy efatra samy manana ny andraikiny izany. Misy ny ho an’ny mpitantana, ny mpampianatra sy ny ray aman-dreny ary ny mpianatra. Amin’ny alalan’ity sehatra ity no ahafahan’ireo tomponandraikitra mitantana ny mombamomba ny mpianatra, ny tsy fahatongavana ary ny fandoavam-bola.
Ny mpampianatra kosa, afaka mamoaka lesona sy entimody, manara-maso ny mpianatra ary mampiditra ny naoty. Ho an’ny ray aman-dreny, ao izy ireo no mijery ny fandaharam-potoana, ny vokatra ara-pianarana ary ny vaovao momba ny fandoavam-bola. Ny mpianatra indray, afaka mijery ny lesona, manao entimody amin’ ny internet ary manara-maso ny vokatra azony.
Ankoatra izany, ahitana tranonkala manokana ho an’ ny toeram-pianarana tsirairay ihany koa. Afaka mampahafantatra ny mombamomba, ny fandaharam-pianarana ary ny hetsika karakarainy amin’ny alalan’izany ny sekoly tsirairay avy.
Fitia Randria
French