Araka ny loharanom-baovao iray avy eo anivon’ny Federasionina malagasin’ny baolina kitra (FMF), mikasa hanao lalao ara-pirahalahiana ny Barea U23 sy ny ekipa nasionaly malagasy zokiny.
“Hitsapa kianja”! Raha tsy misy ny fiovana, hiatrika lalao ara-pirahalahiana, aorian’ilay lalao roa izay ihaonana amin’i Nigeria sy Tanzania, mandritra ny fifanintsanana “Can 2027”, ny Barea A. Raha ny fanazavan’io loharanom-baovao io, tsy mbola voafaritra ny anaran’ilay ekipa hihaona amin’izy ireo amin’izany. Ny teknisianina sy ny staff Barea no hamaritra hoe: iza no azo hanaovana lalao fitsapana rehefa vita ilay fihaonana amin’ i Tanzania, ny 29 septambra ho avy izao, atsy Maroc.
Ankoatra ny ekipa nasionaly zokiny, milaza ity mpampita vaovao ity fa mety hanao fifanandrinana ara-pirahalahiana ihany koa ny Barea zandriny U23, atsy France, mandritra ilay fe-potoana nomen’ ny Caf hihaonana amin’i Comores, izay niala an-daharana. Tsara marihina fa ny Malagasy izay hifandona amin’i Afrika Atsimo, ny volana novambra ho avy izao. Lalao izay tafiditra anatin’ny fifanintsanana hiatrehana ny “Can U23 2027”, hotontosaina any Egypte.
Mbola miandry ny lisitra …
Hatramin’ny nanoratanay, omaly, tsy mbola namoaka ny anaran’ireo mpilalao voaantso Barea A ny eo anivon’ny Federasionina malagasin’ny baolina kitra (FMF). Misy amin’ireo mpilalao milaravinahitra any ivelany nefa efa milaza fa voaantso. Anisan’izany ilay vodilaharana, Eshan Kari. Tsy izay ihany fa mbola mametra-panontaniana ihany koa ny mpanaraka sy ny mpankafy baolina kitra malagasy ny amin’ny hoe : “ Ahoana ny mahakasika ny fifantenana ny Barea U23 ? ”. Andrasana ny tohin’ny raharaha sy ny vaovao ofisialy avoakan’ny Federasionina.
Fitia Randria
French