Namoy ny ainy taorian’ny tifitra nataon’ny vinantolahiny ny ramatoa iray 62 taona teny amin’ny fokontany Tsiadana, boriborintany faha-II, omaly. Nitolo-batana ilay nahavanon-doza.
Voan’ny bala teo amin’ny faritry ny masony ankavia, namoy ny ainy, ny renim-pianakaviana iray tao amin‘ny fokontany Tsiadana, boriborintany faharoa, omaly maraina tamin’ny 7 ora sy sasany. Poa-basy vao maraina no ren’ny mponina manodidina. Nisy fifamaliana teo amin‘ny lehilahy iray, miaramila miasa eo anivon’ny Bat Para sy ny sakaizany. « Tsy nahazaka hisaraka tamin’ity sakaizany ilay lehilahy », hoy ny loharanom-baovao teny an-toerana. Niezaka niaro ny zanany vavy anefa ilay renim-pianakaviana izay miara-monina amin’ilay vehivavy. « Efa niteny tamin’ilay lehilahy mba handeha io ramatoa io. Nanambana fitaovam-piadiana ary nikasa hamono mivantana an’ilay sakaizany anefa ilay miaramila », araka ny fanazavana. Nirefotra intelo ny basy. Voan’ny bala teo amin’ny faritry ny lohany ny renin’ilay vehivavy izay niaro an-janany vavy. Tsy tana intsony ny ain’ ity farany vokatry ny fahaverezan-dra be loatra. Nikoropaka namonjy io olona voan’ny bala io ireo manodidina. Nandositra ilay nahavanon-doza.
Nitolo-batana
Niparitaka tamin’ny tambajotran-tserasera ny fitarainana nataon’ny fianakaviana nanatri-maso ny habibiana. Nitolo-batana ka naterin’ny lehibeny teny amin’ny mpitandro filaminana misahana ny ady heloka bevava ny nahavanon-doza. Araka ny loharanom-baovao marim-pototra, efa nandefa hafatra miafina nilaza fa hamono ho faty an’ilay sakaizany amin’ny basy tamin’ny alalan’ny tambajotran-tserasera facebook ity Sergent ity. Notazomina atao famotorana ity farany. Niroso tamin’ny fikarakarana ny nofo mangatsiaka an’ ilay renim-pianakaviana namoy ny ainy ny havany. Andrasana ny tohin’ ny fanadihadiana ataon’ny mpitandro filaminana. Namoaka fanambarana ny eo anivon’ny Tafika Malagasy fa tsy miombona amin’ny fandikan-dalàna na fihetsika ataon’ olona iray, na iza na iza.
Tsiferana R.
French