Fanamby napetraka ny hanafoana ny lalan-dratsy sy ny lavadavaka ao an-tampon-tanànan’i Toamasina. Tafiditra ao anatin’izany ny fidirana eny amin’ny seranam-piaramanidina Ambalamanasy raha avy ao Toamasina mihazo ny lalam-pirenena faha-5. Etsy ankilany, ho vita tsy ho ela ny fanitarana ny seranan-tsambo ka tsy ho mena-mitaha amin’ny seranan-tsambo iraisam-pirenena any ivelany. Hifangarika amin’izany fotodrafitrasa vaovao izany ny haratsian’ny lalana ao an-tampon-tanàna raha tsy amboarina.
Manoloana ireo, mifanome tanana ny orinasa Spat, mitantana ny seranan-tsambo, tarihin’ny tale jeneraly (DG), Randriambahoaka Heritiana Anicet, andaniny, sy ny Faritra Atsinanana, eo ambany fiahian’ny lehiben’ny Faritra, Razafiarison Jean Jugus, ankilany. Mirefy 300 m ny lalan-dratsy hamboarina eny Ambalamanasy, hatao « béton ». Horaisin’ny orinasa Spat an-tanana ny lalana mirefy 100 m, ka izy ireo no hiantoka ny akora sy fitaovana rehetra ilaina amin’izany, miampy lelavola 100 tapitrisa Ariary.
Hiantohan’ny faritra Atsinanana kosa ny 200 m ambiny amin’ny alalan’ny tetibolan’ny faritra madiodio. Nanomboka ny 14 septambra teo ny asa. Nanao antso avo amin’ireo orinasa hafa ny tale jeneralin’ny Spat mba hifanome-tanana toy izao ataon’izy ireo izao. Satria, tombontsoa lehibe ho an’ny vahoaka sady ho fanarenana ny tanànan’i Toamasina, taorian’ny takaitra navelan’ny rivodoza Gezani farany teo, izao ezaka izao.
Sajo sy Njaka A.
French