Mponina miisa 2 740 no misitraka angovo avy amin’ny masoandro any amin’ny kaominina Beanana sy Antsiafabositra. Ahitana tokatrano tsotra, mpandraharaha ary tranom-panjakana.
Ahitana masoandro mandavantaona sady mafana any amin’ny faritra Betsiboka, toy ny distrika Maevatanana. Notokanana ny zoma 19 septambra ny toby famokarana herinaratra avy amin’ny masoandro. Napetraka ao amin’ny kaominina Beanana sy Antsiafabositra izany. Nitarika ny lanonana ny minisitry ny Angovo sy ny akoranafo, Rabearimanga Radonirina Lucas. Nanotrona azy tamin’izany ny solontena maharitra lefitry ny Fandaharanasan’ny Firenena Mikambana ho an’ny Fampandrosoana na ny Pnud, Jean François Dubuisson.
Mitotaly 2 740 ny olona misitraka ny famatsian-jiro. Mamokatra herinaratra 90 KW ny toby any Atsiafabositra. Nametrahana bateria afaka mitahiry herinaratra 229, 37 KWh, izany hoe, tahiry mandritra ny 3 andro. Mitsinjara amin’ny tokantrano miisa 332, mpisehatra ara-toekarena mahatratra 42, tranom-panjakana (EPP, CEG, CSB, birao kaominina, …) miisa 17, jiro an-dalambe 56, olona mpisitraka 1 660 ny angovo vokariny any an-toerana.
Mamokatra 50 KW ny any Beanana. Afaka mitahiry 91,92 KWh, ampy mandritra ny 2 andro izany. Miisa 216 ny tokantrano misitraka, mpisehatra ara-toekarena enina, tranom-panjakana 14, jiro an-dalambe 28 ary mponina misitraka 1 080.
Notsindrian’ny minisitry ny Angovo, fa tsy mijanona ho fotodrafitrasa fotsiny no natao. Nohamafisiny fa tena fanoitran’ny fampandrosoana. “Hitombo ny fiharian’ny mponina, hiroborobo ny fanabeazana sy ny fitsaboana ary ny ara-tsosialy samihafa. Afaka mamokatra ny rehetra satria azo antoka ny fandriampahalemana”, hoy izy tamin’ny lahateny nataony.
Fiaraha-miasa 3P
Avy amin’ny Pnud, ny Onudi ary ny UNCDF, samy sampandraharaha ao anatin’ny ONU no nahatanterahana ireo fotodrafitrasa ireo. Ao anatin’ny paikady fampidiran-jiro eny ambanivohitra amin’ny alalan’ny tetikasa Famatsiambola iraisana ho an’ny angovo maharitra (Fier). Nambaran’ny solontenan’ny Pnud, fa tsapa tokoa izao ny fahombiazan’ny fiaraha-miasan’ny fanjakana, ny tsy miankina ary ireo mpiara-miombon’antoka iraisam-pirenena (3P). Nametraka ny fotodrafitrasa tany Beanana sy Antsiafabositra ny orinasa Majinco.
Njaka Andriantefiarinesy
French