Rasoloarison Gilbert Anatole Claude Martial, fantatry ny maro amin’ny solon’anarana “Papa”, na “Ndriana Pap’s” (nodimandry 5 taona lasa). Izy no angady nananana sy vy nahitana ny Orchestre PAP’S, fantatra eo amin’ny fanafanana lanonana sy ny fikarakarana rehetra manodidina izany. Homarihina amin’ny hetsika marolafy ny 35 taona nijoroan’ity « orchestre » ity sy ny fahatsiarovana ny faha-5 taona nahafatesan’i Ndriana Pap’s. Hanokafana izany ny « Alim-pikoranana » arahina sakafo (soirée buffet) hatao etsy amin’ny PK.0 Antanimena, ny zoma 30 oktobra ho avy izao.
Ankoatra ny Orchestre PAP’S izay hanafana ny ampaham-potoana betsaka, handray anjara ihany koa ireo mpanakanto namana akaikin’i Ndriana Pap’s sy i Dj Gouty. Nomarihin’i Packo, lahimatoan’i Ndriana Pap’s izay mitarika ny Orchestre ankehitriny fa «ho raitra sy ho matihanina ireo pitsopitsony teknikan’ity «Alim-pikoranana» ity. Nezahina hamaly ny filan’ireo mpankafy rehetra ihany koa ny nandrafetana ny fandaharan-kira.
Amin’ny maha mpitia ny taranja fanatanjahantena baolina kitra an’i Papa. Hitohy ny 15 novambra ao amin’ny Kianja Malacam, amin’ny alalan’ny fifaninanana baolina kitra, ny hetsika Hiara-dalana amin’izany ny seho ankalamanjana. Ny 22 novambra, etsy amin’ny PK.0 Antanimena ihany. Fotoam-bavaka sy fisaorana ireo rehetra niara-nisalahy tamin’ny fankalazana ny faha-35 taona nijoroan’ny Orchestre PAP’S sy ny faha-5 taona nahafatesan’i Papa.
Nanangona : HaRy Razafindrakoto
French