“Marina tokoa fa hiatrika fotoan-dehibe isika amin’ny 11 desambra ho avy izao amin’ny fifidianana izay ho ben’ny Tanàna sy mpanolotsain’ny Tanàna. Ny zava-dehibe ao anatin’izany dia ny hisian’ny filaminana hatrany. Tsy misy tombontsoa azo amin’ny korontana”. Io ny nambaran’ny Praiminisitra Ntsay Christian tamin’ny mpanao gazety tany Antsirabe, faritra Vakinankaratra, ny faran’ny herinandro teo, taorian’ny lanonana famoahana ireo mpianatra polisy nahavita fiofanana tao amin’ny ENIAP. Maniry ny hisian’ny filaminana hatrany ny vahoaka malagasy. Ry zareo eo anivon’ny Polisim-pirenena no nohafarany, fa toy izany koa ny eo anivon’ny fitandroana filaminana, na Zandarimariam-pirenena na ny Tafika malagasy: mitarika hatrany amin’ny fametrahana fandriampahalemana sy filaminana eto amin’ny firenena. Ambenana izay hisian’ny fandrimpahalemana sy filaminana hatrany na amin’ny tontolo ambanivohitra na amin’ny tontolo an-drenivohitra. Mila fandraisana andraikitra izany eo anivon’ny mpitandro filaminana.
“Inspecteur de police” sy “agent de police” miisa 1 217, andiany Sandratra, no vita fiofanana. Nambaran’ny Praiminisitra ny tokony handraisan’izy ireo anjara feno amin’ny fiarovana ny harem-pirenena ary ny vahoaka sy ny fananany. Manana andraikitra lehibe amin’ny fampanjakana ny filaminana eto amin’ny firenena ny Polisim-pirenena amin’ny fiatrehana fifidianana. Fotodrafitrasa lehibe maromaro avy amin’ny fitondram-panjakana no natolony tamin’ny anaran’ny filohan’ny Repoblika, nanamarihana ny faha-20 taonan’ny sekoly ENIAP, Antsirabe.
R. Nd.
French