Nanao atrikasa ho fampiroboroboana ny Paikadim-pirenena hiadiana amin’ny kolikoly (SNLCC) ny eo anivon’ny Komitin’ny fahitsiana (CSI) sy ny avy amin’ny Samifin, omaly, tetsy Antanimena. Niatrika izany koa ny eo anivon’ny Pac sy ny Arai ary ny Bianco, notronin’ny minisiteran’ny Paositra sy ny fampandrosoana niomerika. Niompanan’ny atrikasa hitohy, anio, ny fametrahana ny mangarahara, ny fampiasana ny haitao ara-kajy mirindra amin’ny alalan’ny “Digitalisation”. Hampidirina ara-informatika ny sora-piankohonana mba hiadiana amin’ny kolikoly amin’izao dingana faharoa amin’ny SNLCC izao. Eo koa ny fiarovana ireo antontan-kevitra samihafa ary ny fomba hanaraha-maso ireo mety ho endrika kolikoly. “Ezahina ampifanarahana amin’ny zava-misy eto amin’ny firenena koa anefa izany, ankoatra ny fepetra takin’ny fifanarahana iraisam-pirenena momba ny ady amin’ny kolikoly”, hoy ireo nandray fitenenana.
Nambaran’izy ireo fa natao hanamafisana ny fandalana ny mangarahara izany. Notsindrina manokana ny ezaka ataon’ny eo anivon’ny Frankofonia (OIF) amin’ny fanaovana ny sora-piankohonana, anisan’ny zo fototra maha olona. “Tokony hanana fitokisana amin’izany ny olom-pirenena, satria sady voasoroka ny mety ho fanararaotana samihafa”, hoy ny filohan’ny CSI. Voatsiahy tamin’izany koa ny fifanarahan’ny Firenena mikambana (ONU) iadiana amin’ny kolikoly ny amin’ny tokony hametrahan’ny fanjakana tsirairay ezaka. Anisan’ izany ireo fepetra amin’ny fitantanan-draharaha sy ny fisorohana mialoha ny kolikoly.
Synèse R.
French