Niharan-doza teny amin’ny lalam-pirenena fahefatra ny taksiborosy iray teny Manankazo, omaly maraina. Niala tany Mahajanga, ny harivan’ny talata teo, nikasa hihazo ny Renivohitr’Antananarivo ity fiara fitateram-bahoaka ity. Nandeha mafy ny mpamily tamin’io fotoana io, araka ny fanazavan’ny iray tamin’ireo mpandeha. Tsy nahafehy ny familiana tampoka, nivoaka ny arabe ilay fiara, avy eo nivadika. Tsy nisy nahina ny ain’ireo mpandeha. Ankoatra io, mpitondra moto iray koa voadonan’ny fiara nentina teratany vahiny tao Mahajanga, omaly maraina. Nipitika ilay mpitondra kodiarandroa. Nikasa handositra ilay nitondra fiara saingy tsy lasa alavitra. Nentina nihazo ny toeram-pitsaboana avy hatrany ilay mpitondra moto izay naratra. Niroso tamin’ny fandrasaina an-tanana ny raharaha ny mpitandro filaminana miasa ao an-toerana. Ilaina fitandremana ny familiana eny anivon’ny lalam-pirenena, indrindra ny eto an-dRenivohitra, amin’izao fotoana. Miseholany ny trangana lozam-pifamoivoizana ka ireo kodiarandroa matetika no iharan’izany.
Tsiferana R.
French