Olona telo namoy ny ainy, mpandeha hafa naratra mafy ka ahina mafy ny ainy nandritra ny lozam-pifamoivoizana tetsy Antanetibe Ilafy, omaly alina. Mpitatitra mpiasa amina Call center avy eny Andraharo ilay Mazda tra-doza. Mitondra ireo ankizy mianavaratra mihazo an’Ambohimanarina, Ivandry, Analamahitsy, hatrany Ankadikely sy ny manodidina izy io. Raha ny fanazavana voaangona teny an-toerana halina, voalaza fa nilaozan’ny hisatra ny fiara. Eo am-pidinana ilay lalana eny Antanetibe no nitrangan’ny loza. Tsy voafehin’ny mpamily ny fiara ka nifatratra tamin’ny rindrim-bato tamin’ny sisin-dalana ilay fiara mpitatitra. Potika tanteraka ny lohan’ny fiara. Mpiasa maromaro, anisan’ireo mbola nikasa hamonjy fodiana naratra mafy. Vehivavy iray no fantatra fa namoy ny ainy, tamin’ny ora nanoratana ny vaovao. Misy ireo tena voa mafy ka voatery nentina namonjy hopitaly.
Mila mitandrina
Matetika hitrangana tsy fahatomombanana ny fiara mpanatitra ireo mpiasa mody alina miara-miasa amin’ity tra-doza ity, araka ny loharanom-baovao. Misy ny maty an-dalàna ka mitaintaina izy ireo vao tonga any an-tokantrano. Na izany aza, tsy afa-manao na inona na inona izy ireo noho ny asa fivelomana. Ankoatra ny olana teknika, anisan’ny tena fositra ihany koa ny fandehanan’ny mpamily mafy loatra, kanefa tsy ampy torimaso. Tsy vao sambany no nisy ny loza mahatsiravina, namoizana ain’olona, fa efa nisy koa teny Tsiadana, ny teny amin’ny lalan’i Mausolée, Fort Duchesne, tamin’ny fiandohan’ny taona. Mila fanaraha-maso!
Tsiferana R.
French