Hisitraka fotodrafitrasa ny eny ifotony ary hotohanana ireo tantsaha. Tonga nanatanteraka fitsidihana tao amin’ny minisiteran’ny Fitsinjaram-pahefana sy ny fanajariana ny tany (MFFT), tetsy Anosy, ny solontenan’ny Banky afrikanina ho an’ny fampandrosoana (Bad), omaly. Nitarika ny delegasinina, i Aminata Sow sy i Pumla Majikija. Nifantohan’ny dinika tamin’ny solontenan’ny minisitra, ny sekretera jeneralin’ny MFFT, Randriamananjara Sandrina Anjary, ny tetikasa mifantoka amin’ny fampandrosoana eny ifotony sy ny fifampizarana traikefa. Nohamafisin’izy ireo ny fahavononany hanohana ny fiarovana ara-tsakafo. Tafiditra amin’ny vaindohan-draharaha eto amin’ny firenena rahateo izany, miaraka amin’ ny fanatsarana ny fandaharanasa ho an’ny taona 2025. Manampy izany ny fanamboarana fotodrafitrasa ho tombontsoa ambonin’ireo kaominina sy ny eny anivon’ny tantsaha. Voaresaka ihany koa ny fiarovana ny zon’ny fananan-tany. Eo koa ny fampivoarana ny sehatry ny fambolena, amin’ny alalan’ny paikady ahafahan’ny sehatra miankina sy tsy miankina amin’ny fanjakana mahazo titra eo amin’ny fananan-tany.
Etsy andaniny, tafiditra ao anatin’izany koa ny fampiasan’ ireo sampan-draharahan’ny fananan-tany, ny fitsinjaram-pahefana sy ny haitao ara-kajy mirindra hiarahana amin’ny Bad sy ireo mpiantsehatra ho an’ny fampandrosoana maharitra.
Synèse R.
French