Niakatra fampanoavana, roa lahy namono nahafaty an’i Miley kely sy iray mpiray tsikombakomba niara-notanana am-ponja, ny talata 26 novambra teo.
Notanana vonjimaika any am-ponja, afakomaly, ao Tsiafahy ny roa ary ao Ankazondrano, ny iray, izay samy voasaringotra ho nahavanon-doza namono nahafaty an’i Miley, ilay zazavavy 7 taona, tao Fianarantsoa. Nisy nahita ny roa lahy nibata ny gony nisy ny fatin’io zazavavy io tamin’ ny andro nikarohan’ny fianakaviana azy. Mpibata entana na irony atao hoe Dokera irony ireo olona roa nisy nahita ireo. Nampiahiahy ny manodidina ny fihetsik’izy roa lahy ireo. Nanokatra fanadiadiahana lalina ny mpitandro filaminana nisahana ny raharaha. Olona efatra niaraka nosamborina. Natolotra ny fampanoavana izy ireo taorian’ izay. Nanampa-kevitra ny fitsarana fa hazonina vonjimaika any am-ponja ireo telo lahy raha toa ka nahazo fahafahana ny iray. Nandray anjara mivantana tamin’ny famonoana ilay zazavavy ny roa lahy ka antony nihazonana azy ireo eny Tsiafahy.
Halatra taova
Hatreto, tsy fantatra mazava ny anton’ny nangalaran’ izy ireo ilay zazavavy sy antony namonoana azy. Ahin’ny fianakavian’ny lasibatra ho vonoan’olona tsotr’izao ity natao an-janak’izy ireo ity. Etsy ankilany, miely ny resaka fa mety ho halatra taova no anton’ny nangalaran’ireo olon-dratsy ilay zaza. Raha tsiahivina, novonoina sy natao tanaty gony ny vatana mangatsiakan’i Miley, zazavavikely vao fito taona, ny 18 novambra lasa teo.
Nilaza i Alista Rossina, raibeny fa nivoaka hilalao no nialany tao an-trano. Mangana ny fihirifany, ny hatony, ny kibony ary tapaka ny tanan’i Miley kely tamin’ny fotaoana nahitan’ny havany ny vatana mangatsikany tao atsimon’ ny Lycée Raherivelo Ramamonjy, fokontany Isaha, Fianarantsoa.
Tsiferana R.
French