Nandositra avokoa ny dahalo nangalatr’omby tao amin’ny tanànan’Agnala, kaominina Ambahita, distrikan’i Bekily, ny alarobia 11 desambra teo. Navoakan’ireo olon-dratsy ny omby miisa sivy tao am-bala. Hitan’ny tompon’omby anefa ireo mpandroba. Nanao hazolava, nivoaka avokoa ny olona mipetraka amin’ny manodidina ny tranon’ny lasibatra. Nandositra nitondra ireo omby halatra ny dahalo. Nanara-dia ny fokonolona. Nampandre ny mpitandro filaminana rahateo izy ireo. Nosakanana ny kizo tao Maroviro. Vokany, tratran’ny mpanara-dia tao amin’io fokontany io ireo olon-dratsy. Nifampitifitra ny roa tonta. Tsy nahatohitra ny fokonolona ireo mpangalatr’omby. Nanao tongotra an-katoka ireto farany. Tafaverina avokoa ireo omby nokasain’izy ireo hoentina antsokosoko.
Tsiferana R.
French