Naiditra vonjimaika eny amin’ny fonjaben’i Tsiafahy, ny alakamisy alina teo, ny depiote iray sy ireo mpiara-miasa aminy, tompon’antoka tamina raharaha fanondranana sokatra antsokosoko.
Tsy afa-bela! Nidoboka avy hatrany eny amin’ny fonjaben’i Tsiafahy, ny alakamisy alina teo, ilay depiote iray voafidy tao Soavinandriana Itasy sady inspecteur de police sy ireo mpiara-miasa aminy, voarohirohy tamina raharaha trafikana sokatra. Somary alinalina ihany vao vita ny fihainoan’ny fampanoavana ireto voarohirohy ireto ka izao niafara tamin’ny fampidirana am-ponja izao. Ny alatsinainy 23 desambra 2024 izy ireo no tratran’ny zandary teny Antehiroka niaraka tamin’ireo sokatra miisa 112 nokasaina haondrana antsokosoko. Nitondra fanazavana momba ity raharaha ity ny minisitry ny Tontolo iainana sy ny fandrosoana lovainjafy (Medd), i Max Andonirina Fontaine. Nambarany fa sokabato ny 111, raha sokatra radiata kosa ny iray. « Ireto sokatra ireto, voasokajy ao anatin’ny lalàna eto Madagasikara sy iraisam-pirenena ho tsy azo atao ny fitrandrahana azy, ny fitazonana, ny fivarotana, ny fanondranana ireo biby ireo », hoy izy. Fiara roa no nitondra ireo sokatra ireo : ny iray nitondra sokatra miisa 107, raha dimy kosa ny tao anatin’ny fiara iray faharoa.
Miisa 2 499 ireo sokatra
Nomarihiny fa nametraka fitoriana ny Medd ka mangataka ny hanomezana sazy hentitra amin’ireo mpanao trafika. « Ny tanjona dia ny fandravana tanteraka ny tambajotra rehetra sy ny fanakanana ny fanaovana izany. Miteraka fatiantoka ara-toekarena rahateo ny fanaovana ny trafikana sokatra », hoy ny Medd. Nohamafisiny tamin’ny alalan’ny fanomezana antontanisa fa nahatratra 2 499 ireo sokatra tratra saika hamidy na haondrana tamin’ity taona 2024 ity, raha 72 kosa ireo varika. Ho an’ny resaka momba ny sokatra, 19 ireo raharaham-pitsarana, raha 29 kosa ireo olona voampanga. Ny 22 amin’ireo naiditra am-ponja raha fito no efa voasazy. Mangataka ny hanaovana fanadihadiana lalina ny Medd mba hamongorana tanteraka ireo mpanao trafika na eto an-toerana izany na iraisam-pirenena.
Jean Claude
French