VHT- fifidianana ben’ny Tanàna : “Mba hivoaka ny marina “

“Raha tena fanjakana tan-dalàna tokoa i Madagasikara, ka tsy hakorontana ny zava-misy sy ny fiainam-pirenena: tokony hisy lalana ahazoana mivoaka sy ahitana ny marina any amin’ny fitsarana misahana ny ady ifanaovana amin’ny fanjakana”. Io ny fanehoan-kevitry ny filoha nasionalin’ny antoko Vonona hijoro ho an’ny tanindrazana (VHT), Raza­nakoto Norbert, manoloana ny toe-draharaham-pirenena amin’izao fiandrasana ny vokatra ofisialy tamin’ny fifidianana ben’ny Tanàna sy mpanolotsain’ny Tanàna, na­tao tamin’ny 11 desambra 2024, izao. Mba hivoaka ny marina ny amin’izany fifidianana izany. Mba hiharan’ny lalàna avokoa izay nandika lalàna sy nangala-bato ary nanao zavatra tsy milamina. Mba ho taona vaovao anjakan’ny filaminana sy fandriampahalemana ary demokrasia mbamin’ny fanjakana tan-dalàna tokoa ny taona 2025.
Raha atao jery todika ny fanaovana politika eto Mada­gasikara, tamin’iny taona 2024 iny, mihemotra ny de­mo­krasia. Misy ny tsy fihainoana ny hafa, fa izay tiana hatao ihany no hatao. Fomba fiteniny ny hoe azo raisina fa tsy mitombina. Fa ny zava-misy eto Madagasikara: mi­tombina fa tsy azo raisina. Mitombina ny fanehoan-kevitra ataon’ny olona, fa tsy azo raisina: tsy misy mihaino, tsy misy miraharaha. Gaga ny tena raha misy ny fanakianana mamaivay. Tsy mahazaka ny olona, ary miezaka miteny.

R. Nd.