Nanao fanambarana tetsy amin’ny Arena Ivandry ireo depiote avy amin’ny Irmar, omaly. Nanao antso avo amin’ny filohan’ny Repoblika izy ireo tamin’izany manoloana ireo tsy maharaka ny hafainganam-pandehan’ny filoha.
“Aoka hosaziana sy hoesorina ireo tomponandraikitra tsy mahefa ny adidy napetrakao taminy sy amin’ny vahoaka”, hoy izy ireo. Takin’izy ireo amin’ny mpanatanteraka rehetra manomboka any ambony ka hatrany ifotony ny hijerena ny tena mangirifiry ny vahoaka ary ho haingana famindra ao anatin’izany.
Etsy andaniny, helohin’ireo depiote mpanohana ny fitondrana ireo koa ny fihetsika na koa fitarihana ho any amin’ny korontana, indrindra taorian’ny fifidianana ben’ny Tanàna farany teo. “Tsy azo ekena ny fanimbana ny ezaka lehibe
efa vita sy ny mbola hatao ary koa ny fampiadiana ny samy Malagasy”, hoy ihany izy ireo. Nohamafisiny koa fa tokony hajaina hatrany ny soatoavina maha Malagasy amin’ny alalan’ny fifanampiana sy ny fifanajana ary koa ny fifankatiavana.
Ady amin’ny fiakaran’ny vidim-piainana
Notsindrin’ireto depiote Irmar ireto fa mitohy ny fanarenana ny lesoka ary koa ny fanorenana ny hoavy feno fanantenana ho an’ny vahoaka. Tsy ho vita anatin’ny fotoana fohy anefa ny fanarenana ka hiantsoana ny fiarahana misalahy. “Manana adidy sy andraikitra amin’izany ny herivelona eto amin’ny firenena”, hoy ireto depiote ireto.
Notsiahivin’ireto olom-boafidy ireto koa fa efa nisy ny ezaka natao hanatsarana ny fiainan’ ny vahoaka. Eo koa ny fitakian’ izy ireo amin’ireo mpanatanteraka. Anisan’izany ny ady amin’ ny fiakaran’ny vidim-piainana, ny famoronana asa, ny fitsinjovana ny marefo sy ny zaza amam-behivavy, ny fanohanana ny tantsaha. Mitohy koa ny fanorenana fotodrafitrasa, toy ny hopitaly, lalambe migodana, ny tohodrano. Ny ady amin’ny tsy fandriampahalemana…
Synèse R.
French