Nifono tao anaty lamba toy ny fatin’olona, lehilahy iray velonaina soa aman-tsara hitan’ny fokonolona teny Ampefiloha, omaly maraina. Misoloky sy manao mody mampalahelo izy. Efa fanaon’io lehilahy io sy ny mpiray tsikombakomba aminy izao teti-dratsy izao. Manana namana roa lahy izy mihaodihaody tsy lavitra miaraka aminy. Ireo namany ireo, araka izany, no mamatotra sy manidy azy ao anatin’ny lamba. Manao sary maty hany sisa ataon’ity farany ary miandry ny fokonolona hahita azy. Sokafan’ny mpandalo, manao mampalahelo ary maneho taratasy nanambara fa avy nifonja io lehilahy io. “Efa fanaony ny toy izao. Mody miovaova toerana hafa fotsiny izy ireo manao io fisandohana io”, hoy ny nambaran’ny nanatri-maso. Voamarina rahateo fa tsy azy akory ilay taratasy fahazoan-dalana nivoaka ny fonja fa an’olona hafa. Tsy manaiky entin’ny olona eny anivon’ny toeram-pitsaboana izy rehefa misy tsara sitrapo manolo-tena hitondra azy. “Mivadika ho salama tampoka eo no ho eo amin’ny maha mpisoloky azy”, hoy hatrany ny loharanom-baovao. Marihina, efa nahitana tranga tahak’ity tetsy Ampefiloha ity koa, teny Tsiadana, roa volana lasa.
Tsiferana R.
French