Nangalatra ordinatera tao amina orinasa iray ao Behoririka, olona telo tra-tehaky ny polisy. Tratra teny amin’izy ireo ny entana halatra rehetra.
Voasambotry ny mpitandro filaminanana ao amin’ny boriborintany faharoa, etsy Ambohijatovo, ny alarobia 5 febroary teo, ireo olona telo noho ny halatra sy vaky trano. Nitrangana vaky trano tao amin’ny orinasa iray ao Behoririka. Naharay fampandrenesana ny mpitandro filaminana ka nijery ifotony ny zava-misy. Nitaraina ny tompon’ny orinasa fa lasan’ny olon-dratsy avokoa ny fitaovam-piasana rehetra, toy ny solosaina sy ny fitaovana informatika tao amin’ilay orinasa. Lehilahy iray no voasaringotra ho tompon’antoka tamin’ny fahaverezan’ireo entana ireo. Nanao ny fisavana ny toeram-ponenan’io lehilahy nahiahina io ny polisim-pirenena. Tra-tehaka, tamin’izany, ny solosaina miisa 30 izay anisan’ny nangalarin’ilay lehilahy tao anatin’ny orinasa voalaza. Nahatrarana entana hafa toy ny bisikileta koa tao aminy. Niaiky heloka, nanambara ireo namany niisa roa niaraka nanao ny asa ratsy taminy io lehilahy io. Niara-voasambotra izy telo. Nogiazana avokoa ireo entana halatra rehetra tao aminy. Nentina natao famotorana, hatolotra ny fampanoavana aorian’ny fanadihadiana lalina izy telo ireo.
Nahatrarana basy
Ankoatra io, basy vita gasy iray tra-tehaky ny mpitandro filaminana eo anivon’ny CSP5 Mahamasina, teny Ankazotoho Anosimahavelona, ny 5 febroary teo. Telo lahy nifanehatra tamin’ny mpitandro filaminana nanao fisafoana teny amin’io faritra io no nanipy kitapo iray. Nitsoaka nandositra ireo olona voalaza ireo. Nosavaina ny kitapo, kinanjo nahitana fitaovam-piadiana niampy bala miisa efatra. Tsiahivina, basy “pistolet automatique“ iray nogiazan’ny mpitandro filaminana teny amina lehilahy iray tao Ankadikely Ilafy, ny fiantombohan’ny herinandro teo. Niampy iray indray ankehitriny ny fitaovam-piadiana tra-tehaka.
Tsiferana R.
French