Ravan’ny polisim-pirenena ireo olon-dratsy mpaka an-keriny ilay zaza varira, dimy taona, very tany amin’ny distrikan’i Vohipeno, ny faran’ny herinandro lasa teo. Mahatratra 17 ireo tompon’antoka tamin’izany.
Tratran’ny polisim-pirenena tany amin’ny lalam-pirenena faha-12, tao Ambila, 20 km miala an’i Manakara, afakomaly tamin’ ny 10 ora alina, ireo nangalatra sy nitondra ilay zaza varira, 5 taona, nisy naka an-keriny ny faran’ny herinandro lasa teo. Hatramin’izao, mahatratra 17 ireo olon-dratsy sy niray tsikombakomba ary tompon’antoka voasambotra mahakasika ity raharaha fakana an-keriny ity. Efa notazomina any amin’ny biraon’ny polisy sy zandary avokoa izy ireo. Nahitana vehivavy ary anisan’ny olon-dratsy ny raikelin’ilay zaza, raha ny angom-baovao avy amin’ny polisy.
Nafenin’ireo olon-dratsy tao amin’ny trano iray, tao Ambila, io zaza varira nalain-dry zareo an-keriny io, raha ny angom-baovao azon’ny polisim-pirenena any an-toerana ihany. Nanao ny paikady sy vela-pandrika rehetra mba hanavotana io zaza io ny mpitandro filaminana. Raikitra ny fifandonana teo amin’izy ireo sy ireo olon-dratsy. Vokany, dimy mianadahy no voasambotra, ka vehivavy ny iray tamin’izy ireo. Raha tafaporitsaka kosa ny sasany nandritra ny fifandonana. Voatifitra tamin’ny tongony ny iray tamin’ireo tafaporitsaka ka voasambotra ihany. Valo ny fitambaran’ny voasambotra, izay mpiray tsikombakomba sy tompon’antoka mivantana amin’ny fakana an-keriny. Ankoatra izay, olona sivy hafa nosamborina sy notazonina ao Vohipeno, ao amin’ny biraon’ny Polisy sy ny Zandary, any an-toerana.
Tafaverina soa aman-tsara ilay zaza
Hita sy avotra soa aman-tsara nandritra io fisamborana io ilay zaza varira, dimy taona, nalaina an-keriny. Efa nalain’ ny ray aman-dreniny tany an-toerana moa ilay zaza taorian’izay.
Raha tsiahivina, nisy naka an-keriny tao an-tranony, tany amin’ny fokontany Foroforo, kaominina Vinany, distrikan’i Vohipeno, io zaza varira io, ny alahady maraina tamin’ny 3 ora. Niara-natory tamin’ny ray aman-dreniny izy io no nisy naka. Niditra antsokosoko tao an-trano ireo olon-dratsy naka an-keriny io zaza io. Taitra tamin’ny 3 ora sy sasany ny reniny, nefa tsy nahita ilay zaza teo am-pandriana intsony. Tonga nijery ny zava-misy teny an-toerana ny zandarimaria nanao ny fanarahan-dia ary izao nahitam-bokany izao.
Mino
French