Sakana ho an’ny fanabeazana ny tovovavy malagasy ny olan’ny fadimbolana. Eto Madagasika, mahatratra hatrany amin’ny 20% ny tovovavy, eo anelanelan’ny 15 ka hatramin’ny 24 taona, no tsy mianatra noho izy ireo tsy afa-miaina am-pilaminana mandritra ny fadimbolany noho ny toe-bolany (précarité menstruelle). Anton’izany ireo fady ara-kolontsaina, ny vaovao diso. Nahatonga ny TotalEnergies Marketing Madagasikara sy ny TotalEnergies Women’s Initiative for Communication and Exchange (Twice), le réseau des collaboratrices de TotalEnergies nanao ny hetsika “Brisons les Règles” nandritra ny fankalazana ny Andro iraisam-pirenena ho an’ny zon’ny vehivavy izany. Hetsika natao hiadina amin’ireo olana samihafa sedrain’ny vehivavy mandritra ny fadimbolany. Manoloana izany, manentana ny rehetra hanafoana ireo fady mahakasika ny « précarité menstruelle » izy ireo. Hanamora ihany koa ny fisitrahan’ny vehivavy ireo salaka azo sasana ka hiverenana indray. Tafiditra ao anatin’izany ireo hetsika fanabeazana ara-pahasalamana ny tovovavy mandritra ny fadimbolany. « Andao fohanana ireo sakana rehetra manimba ny hoavin’ny tovovavy. Andao hifanohana hisitrahan’ny tovovavy fanabeazana sy fitaovana ilaina rehetra mandritra ny fadimbolany », hoy ny tale jeneralin’ny TotalEnergies Marketing Madagasikara SA, Marieme-Sav Sow.
Miara-mientana
Fanoitra ho an’ny fampandrosoana ny toekarena sy ny fiainana ara-tsosialy ny fanabeazana ny tovovavy sy ny fisitrahany ireo fampitaovana ara-pahasalamana mandritra ny fadimbolany. Vonona hiara-mientana amin’ireo mpiara-miombon’antoka samihafa hatrany ny TotalEnergies Marketing Madagasikara hanohy ny hetsika ataony sy hampaharitra izany mba hipaka mivantana amin’ny rehetra.
Marihina fa nisy ny fanentanana samihafa mahakasika ny hetsika ka anisan’ny nanatrika izany ny ben’ny Tanàna an’Antananarivo, Ramanantsoa Harilala.
Henintsoa H.
French