Nihaona tamin’ny tantsaha eny Atsimondrano, omaly, ny Sekreteram-panjakana miadidy ny Fahavitan-tena ara-tsakafo (SESA), Razanamahefa Tahian’Ny Avo. Hita fa mahomby ny fanirin’ny vary safiotra.
Nanomboka tamin’ny desambra 2024 ny fifaninanana mamboly vary safiotra « Andao Hamboly ». Nahomby ny fanirin’ny vary safiotra eny amin’ny distrika Atsimondrano. Nambaran’ny tantsaha mpamboly iray eny amin’ny kaominina Fenoarivo, fa mahavelom-panantenana ity karazam-bary ity. Mahatratra 240 ny isan’ny voam-bary akotry amin’ny salohim-bary iray amin’ny vary safiotra, amin’izao fotoana izao, raha 130 ny an’ny vary mahazatra. Mbola hitombo ny isany mandra-piakatry ny vokatra ». Nilaza ny depiote voafidy teny Atsimondrano, Ratsivahiny Andry, fa « mahazaka tsara ny toetr’andro ity karazam-bary ity. Niaraha-nahita fa tara ny rotsakorana tamin’ity taom-pambolena ity, ka tara ihany koa vao nanomboka namboly. Tsy nahasakana ny hatsaran’ ny vokatra anefa izany ». Marihina fa teny an-toerana ihany koa ny teknisianina sinoa amin’ ny vary safiotra, ka nahita maso ny fahombiazana.
Hiofana any Sina
Notsipihin’ny Sekreteram-panjakana SESA, Razanamahefa Tahian’Ny Avo, fa « mamaly mivantana amin’ny vina napetraky ny filohan’ny Repoblika ny fifaninanana « Ndao Hamboly ». Izay mifototra amin’ny fampivoarana ny fomba sy ny rafi-pambolena entina hanatrarana ny fahaleovantena ara-tsakafo. Nohamafisiny fa fanohizana ny fanohanana ny tantsaha mivantana ity hetsika fifaninanana mamboly ity. Hisitraka fampiofanana ara-teknika any Sina, miaraka amin’ny teknisiana sy manampahaizana amin’ny voly vary safiotra ny tantsaha hahazo vokatra avo indrindra.
Ankoatra izany, resy lahatra ny tantsaha hafa eny Atsimondrano, satria nahita maso mivantana ny fahombiazana sy ny vokatra tsara azo amin’ny vary safiotra. Maniry mafy izy ireo ny hitohizan’ny fanohanana amin’ny famatsiana masomboly tsara kalitao, izay efa natao tamin’ ity taom-pambolena 2024-2025 ity.
Njaka Andriantefiarinesy
French