Miakatra ny vidin-tsolika eto Madagasikara mandritra ity volana mey ity. Antony mahatonga izany ny fiakaram-bidy eo amin’ny sehatra iraisam-pirenena nandritra ny volana marsa teo.
Nihena ihany koa ny vokatr’ireo mpanondrana manoloana ny zava-misy ara-toekarena maneran-tany izay mandray anjara amin’ ny fomba hikajiana ny vidin-tsolika mihatra eto amintsika. Araka izany, “miova ny alin’ny alahady hifoha alatsinainy ny vidin-tsolika eto Madagasikara”, hoy ny minisitry ny Angovo sy ny akoranafo, Jean Baptiste Olivier, ny sabotsy teo, tao amin’ny fahitalavi-pirenena. Na izany, tsy hihoatra ny 200 Ar ny fiakarana hihatra amin’ny vidin-tsolika na ny fidinany, araka ny fifanarahana natao amin’ny Tahirim-bola iraisam-pirenena (FMI), hoy hatrany ny fanazavany. Hatramin’ny ora nanoratanay farany, mbola tsy voafaritra kosa ny fiakaran’ny vidin-tsolika ho an’ity volana ity.
Hihena
Na izany, mety hihena ny vidin-tsolika ho an’ny volana jona sy jolay eto Madagasikara noho ny fiakaran’ny taham-pamokaran’ireo firenena mpanondrana, ny volana avrily lasa teo. “Hisitraka izany ihany koa isika”, hoy hatrany ny minisitra. Nambarany fa maharitra 30 ka hatramin’ny 40 andro ny fahatongavan’ny sambo mpitatitra ka ny vidiny tamin’ny volana avrily izay nilatsaka kokoa no hahazoantsika izany.
Ankoatra izay, mandray anjara feno amin’ny vidin-tsolika ny sandan’ny dolara, ny voalohan’ny volana avrily teo, manodidina ny 4 650Ar ny dolara raha midina hatrany amin’ny 4 450Ar izany amin’ izao fotoana ka izay no hiantraika amin’ny vidin-tsolika ny volana ho avy izao. Tsiahivina fa efa tsy nihetsika ny vidin-tsolika ny volana avrily teo. Vidiana 5 320Ar/litatra ny lasantsy, 4 970Ar/l ny gazoala raha toa ka niakatra 3 030Ar/l ny solika fandrehitra.
Henintsoa
French