Nanomboka omaly hatramin’ny 6 jolay izao ny varotra fampirantiana ny vokatra vita malagasy etsy amin’ny tokotany malalaka Carrefour Ankorondrano. Tanjona ny hanomezan-danja ny fambolena vita malagasy 100%, indrindra ny vokatra biolojika, toy ny vary, ny voankazo, ny voatabia, ny sesame sy ny maro hafa. Anisan’ny mandray anjara amin’ity hetsika ity ny Kaoperativa Mamisoa Fenoarivobe Vohitsindry (KMF V), mpanodina kafe ho lasa vovony, efa vita anaty fonosana manaraka ny fenitra. Toraka izany koa, ny kaoperativa Manampatrana miray hina (MMH), miompy sy manodina ny tantely, tohanan’ny Fandaharanasa Defis, eo ambany fiahian’ny minisiteran’ny Fambolena sy ny fiompiana (Minae). Anisan’ny vokatra vita malagasy tsara kalitao hita eny koa, ny vovo-mangahazo efa vita anaty fonosana manara-penitra, sns.
Mandray anjara rahateo amin’ny fampirantiana vokatra 100% vita malagasy ity minisitera ity. Hita eny ny karazana fandaharanasa sy tetikasa tanterahiny, na koa iarahany amin’ireo mpiara-miombon’ antoka isan-tsokajiny. Laharam-pahamehana ny fanomezana tosika hatrany ny tantsaha mpamokatra malagasy, hampiroboroboana ny famorana tantanin’ny fianakaviana, sady hampitomboana ny vola miditra isan-tokantrano. Ao anatin’izany ny fanohanana ara-teknika sy ara-pitantanana ny fikarohana lalam-barotra, sns. Satria, tanjona ny hanatrarana ny fahavitan-tena ara-tsakafo.
Njaka A.
French