Noraisin’ny minisitry ny Fizahantany sy ny asa tanana (MTA), Dewa Viviane, omaly, teny amin’ny toeram-piasany, ny ambasadaoro vaovaon’i Maorisy, Bruno Cunniah,
miasa eto amintsika. Nifantoka tamin’ny fanamafisana ny fiaraha-miasa amin’ny fampiroboroboana ny fizahantany iombonana ny fihaonana, voafaritra ao anatin’ny faritra ranomasimbe Indianina, ny « iles Vanilles ». Manampy izany, ny fifanarahana fiaraha-miasa ao anivon’ny Sadc, satria samy mpikambana ao i Madagasikara sy i Maorisy.
Noresahina ihany koa ny fikarakarana ny Fihaonambe ara-toekarena hatao any Maorisy, amin’ny volana desambra 2025 ho avy izao. Hitarika ny delegasionina malagasy amin’io fotoana io, ny filoha Rajoelina Andry, entina hampiroboroboana ny fizahantany sy ny asa tanana malagasy.
Tsiahivina fa anisan’ny manana fifanarahana fiaraha-miasa ara-toekarena i Madagasikara sy i Maorisy, izay natao sonia tamin’ny taona 2019. Voakasik’izany ny sehatry ny fizahantany, ny fanodinana sakafo, ny teknolojia niomerika (TIC) ary ny harena an-kibon’ny tany.
Njaka A.
French