Maro ny hetsika mialoha ny Fihaonambe an-tampony andiany faha-45 ny Sadc. Anisan’izany ny « Bazar de la Sadc », eny amin’ny foibe Enirace, Lac Iarivo.
Nosantarin’ny filoha Rajoelina Andry, afakomaly, ny hetsika « Bazar de la Sadc ». Miisa 200 ny tranoheva eny an-toerana, ahitana mpandray anjara maherin’ny 300 isa. Hita eny ny vokatra ara-toekarena sy ny ara-kolontsaina eto amintsika, hanasongadinana ny tena Vita Malagasy. Etsy ankilany koa, samy mampiseho ny mampiavaka azy ara-toekarena, ara-tsosialy ary ara-kolontsaina ireo firenena 15 hafa ao anatin’ity vondrona ity. Fotoan-dehibe ihaonan’ireo mpandray anjara ity fotoana ity. Satria, anisan’ny tanjona lehibe ny fifanakalozana sy ny fifandraisana. Vaindohan-draharahan’ny Sadc ny fifandraisana ara-toekarena. Misy ny fepetra raisina hanamorana izany, toy ny fanalalahana ny tsena, izany hoe, tsy hitataovana haba. Tsiahivina fa hetsika efa natao ihany koa ny « Herinandron’ny Sadc ». Izany dia nifantoka tamin’ny lohahevitry ny fanovana ny rafi-pamokarana, ny indostria ary ny angovo azo havaozina.
Hetsika samihafa
Na tsy mivantana aza, mifanandrify amin’izao fotoan-dehibe eto amintsika izao koa ny fisian’ny fotodrafitrasa vaovao maro samihafa. Nahitana ny fisokafan’ny « Voie rapide » mampitohy an’Ivato sy ny fiolahana eny Andranotapahina, mipaka any amin’ny Art malagasy, sampanana Ambohitrimanjaka. Notokanan’ny filoha Rajoelina Andry, omaly, ihany koa ny zotra teleferika, mampitohy an’Ambatobe hatrany Anosy.
Njaka Andriantefiarinesy
French