Hifampiarahaba noho ny taona vaovao ireo poeta sy mpankafy poezia ary mpanaraka antsa tononkalo, ny alahady 5 febroary ho avy izao. “Hetsika iantsoana ireo mpisehatra izany anaty tambajotran-tserasera sy anaty onjam-peo koa izany”, hoy ny tompon’andraikitra, mpikarakara ny hetsika. Hanomboka amin’ny 9 ora maraina ary hifarana amin’ny 4 ora tolakandro ny fihaonana. Fotoana koa io ifankafantarana eo amin’ireo samy mpisehatra amin’ny literatiora. Tafiditra ao anatin’ izany koa ny “Antsa malalaka” andraisan’ny rehetra anjara sy tsy anavahana.
Ao anaty fandaharam-potoana koa ny fanoloran’ ny mpankafy fanomezana sy mari-pahatsiarovana ireo poeta tena nandona ny fony hatramin’izay. Arahin’ny fiaraha-misakafo sy miala hetaheta, araka ny fahafahan’ny tsirairay manao izany.
Boky “Tsy mba zaza”…
Tsy vitan’izany fa hamidy amin’io fotoana io koa ny boky “Tsy mba zaza”, andraisan’ireo poeta miisa 83 anjara, ahitana ny asa sorany avy, anaty pejy miisa 116. Natonta amin’ny endriny vaovao izany boky izany. Nanao ny teny fanolorana kosa, Ny Iraka Rambolamanana. Anisan’ny mikarakara ity hetsika ity ny eo anivon’ny Lidera fito mianadahy. Anisan’izany i Art Fetra mikalo, NY antsaly, Lea Fandresena, Bins, Indrafo Tsihoarana, Ny Anoka Notiavina.
Tsiahivina fa hetsika efa fanaon’ireo mpisehatra eo amin’ny literatiora ny tahaka izao, amin’ny fiandohan’ny taona. Nahavory mpankafy sy ireo poeta marobe hatrany izany.
Synèse R.
French