Tonga ny fotoana hanehoana ny ketrika! Volana vitsivitsy lasa izay no nitsiry ny hevitra izay lasa tetikasa, hananganana tarika iray hivoy sy hitrandraka ny hira sy dihy vakodrazana manerana ny Nosy, ka afaka hisolo tena an’i Madagasikara rehefa misy ny hetsika ara-javakanto iraisam-pirenena. Taorian’ny fitiliana ireo mpanakanto, natsangana ny Malagasy Folkloric Band na ny Maf’B, izay tetikasan’ny minisiteran’ny Serasera sy ny kolontsaina.
Nanainga omaly, nihazo an’i New Delhi any Inde ireo mpanakanto 18 mianadahy mandrafitra ny Maf’B. Handray anjara amin’ny “Festival Surajkund”, izay handraisana tarika avy amina firenena maro anjara, izy ireo. Efa tsara hofana teo anivon’ny akademiam-pirenena misahana ny zavakanto sy ny kolontsaina (Anac), izay mpiahy mivantana azy ny Maf’B.
Ankoatra ny fakana traikefa eo amin’ny sehatra iraisam-pirenena, haneho ny maha Malagasy amin’ ny alalan’ny zavakanto no tena tanjon’ny Maf’B. Tsy ho mena-mitaha amin’ireo mpanakanto avy amin’ny firenen-kafa, izay samy hanao izay hampiakatra ny lazan’ny firenena nihaviany avy izy ireo.
Zo ny Aina
French