Hifantoka amin’ny fahombiazana sy ny fampitomboana vokatra ny minisiteran’ny Indostria sy ny Fampandrosoana ny Sehatra Tsy Miankina (MIDSP). Nivoitra izany nandritra ny fananganan-tsaina voalohany nataon’ny minisitra Rasoarahona Andriniaina sy ireo mpiara-miasa aminy. Nantitranterina fa hitohy sy hohamafisina ny asa sy ny hetsika rehetra ataon’ny minisitera, izay mifanaraka amin’ ny paikady ara-toekarena vaovao noraisin’ny fanjakana. Nambarany fa efa nahitam-bokany sahady ireo ezaka efa natao. Tanteraka tao anatin’ny roa volana monja hoy izy ny 90%-n’ireo tetikasa “Quick Wins”, izay mikendry ny fampiroboroboana ny indostria sy ny fampandrosoana ny sehatra tsy miankina. Vokatra azo tamin’ny fiaraha-miasa sy ny fandraisan’andraikitra iombonan’ny ekipa ao amin’ny minisitera. Anisan’ireo dingana lehibe efa vita ny fiarovana ny fampisam-bola, izany hoe, ny fanavaozana ny lalàna misahana ny fizakamanana ara-indostrialy, famolavolana ny didy fampiharana ny lalàna mifehy ny fampandrosoana ara-indostrialy sy ny ezaka hampihenana ny fanafarana entana avy any ivelany. Tafiditra ao anatin’izany ny fanatsarana ny fitantanana ireo orinasa “One district One factory” (Odof), izay heverina ho antoky ny fampiroboroboana ny famokarana eto an-toerana sy ny fampandrosoana ara-toekarena isam-paritra. Nampirisika ny mpiara-miasa rehetra aminy ihany koa ny minisitra mba hanohy hatrany ny asa iombonana sy ny firaisankina ho fanatrarana ny tanjona iraisana dia ny fampandrosoana maharitra ny firenena.
Henintsoa
French