Misy amin’ny vehivavy no menatra raha fantatry ny olona fa mampiasa fomba fandrindrana fiainam-pianakaviana (PF) izy. Mafy ny fanenjehana sy fitsaratsaran’ny fiarahamonina noho ny tsy fahafantarana ny maha zava-dehibe ny fampiasana azy ireny.
“Tsy midika ho favetavetana na fijangajangana na hamaolana velively ny fanaovana fanabeazana aizana fa tena fandraisana an-tanana ny momba ny fahasalaman’ny tena”, hoy ny dokotera mpiantsehatra amin’ity fanentanana ity.
Fahatongavan-tsaina ary mariky ny fahamatorana amina fanapahan-kevitra hikarakara ny tena sy ny ankohonana mihitsy ny fidirana an-tsehatra hanaovana fandrindram-piterahana. Fisorohana ny vohoka tsy iriana, fiarovana amin’ny tera-bitro fa indrindra fiahiana ny ankohonana tsy ho kitoatoa na ho tsizarizary. Fahafahana misafidy ny isan’ny zaza ateraka sy ny elanelan-taona tiana hiterahana mba hahalavorary tsara ny fitaizana sy ny fivelomana ka tsy ho vesatry ny ankohonana ny fitondrana vohoka lava ny fampiasana azy ireny.
Ho an’ny tanora, fiarovana amin’ny areti-mifindra ny fampiasana kapoty sady miaro amin’ny vohoka tsy iriana ihany koa.
Tatiana A
French