Toy ny mahazatra, hitohy amin’ny « podium » goavambe ny matso etsy Mahamasina. Mpanakanto malaza maro no hanafana izany. Hisy koa isam-paritra.
Anatiny tanteraka. Efa andro maromaro izay no nanomboka ny fanamarihana ny faha-66 taona niverenan’ ny Fahaleovantena, izay sady fetim-pirenena malagasy. Anio sy rahampitso kosa ny ivon’ny fankalazana, manerana ny Nosy. Toy ny mahazatra isan-taona, hisy ny matso lehibe hatao eo amin’ny Kianjaben’i Mahamasina, ny 26 jona, satria fetin’ny Foloalindahy ihany koa izany. Hialohavan’ny seho ara-javakanto sy ara-pilazantsara. Mampanantena seho miavaka ireo hanatontosa izany, na ho an’ireo hijery mivantana eny Mahamasina, na ireo hanaraka amin’ny fahitalavitra.
Hitohy amin’ny « podium » goavambe kosa izany ny tolakandro. Mpanakanto maro no nantsoina manokana hanafana ny fotoana. Anisany ry Iraimbilanja, Mahaleo, Bolo, Nate Tex, Thierry Kougar, Stéphanie, Ken, Théo Rakotovao, Telofangady, Kaiamba, Sakateboy, Da Hopp, Young Jeff, sy ny maro hafa. Nosafidiana manokana ho avy amin’ny faritra maro manerana ny Nosy, sy mivoy gadona maroloko ihany koa ireo tarika ireo. Fanehoana ny firaisam-pirenana amin’ny alalan’ny zavakanto hatrany mantsy no voizina.
Mialoha izany, hotontosaina amin’ny 25 jona ny afomanga lehibe, etsy Anosy. Tsy lavitra eo koa ny « podium », ho fampifaliana ny rehetra. Hifandimby an-tsehatra mandritra izany ry Ndondolah sy Lucia, Njakatiana, Mijah, Samoëla, sns, mialoha ny afomanga. Miato kely izany, avy eo, mitohy ihany. Efa misy afomanga ihany koa nomanina any amin’ireo renivohi-paritra, ankoatra ny « podium ».
Mbola anatin’ny fankalazana hatrany ny namoahan’i Ken hira manokana, manodidina izany. Eo koa ny fanentanana ny rehetra amin’ny fitafiana malagasy, ny andron’ny rahampitso 26 jona.
Zo ny Aina
French