“Tsy misy gadra politika eto Madagasikara”. Io ny valintenin’ny Praiminisitra Rajaonarison Mamitiana, teny Ivandry, omaly, manoloana ny toromariky ny Sadc tamin’ny fihaonana manokana nampitain-davitra, tany Botswana, afakomaly, momba an’i Madagasikara. Fandikan-dalàna avokoa no nisian’ny fanasaziana. Anisan’ny fehinkevitry ny SADC ny hamerenana ny antso hamotsorana ireo gadra politika sy ny hampitsaharana ny fisamborana tsy ara-dalàna ary ny hamelana ny fiverenan’ireo sesitany ara-politika. Ireo no heverina ho fototry ny fifampitokisana sy ny fampihavanam-pirenena. Tsy maintsy mifarana ny desambra 2027 ny Fanavaozana, araka ny nambaran’ny Praminisitra.
Taorian’izay, naneho ny heviny ny filohan’ny Fanavaozana, ny kolonely Randrianirina Michaël, teny Ivato, omaly: “Vonona ny hiara-kiasa amin’ny Sadc ny fitondram-panjakana malagasy amin’ny famahana ny olana, raha misy tokoa ny olana. Satria mitohy ny asan’ny andrimpanjakana, ary vonona ihany koa ny hiara-kiasa amin’ny fanatanterahana ny fifidianana”. Misokatra amin’ny fandraisana anjaran’ ny ankolafy rehetra ny fitondram-panjakana na ny mpanohitra aza. Tsy nisy ny fanenjehana ara-politika teto Madagasikara. Olona voarohirohy amin’ny famotsiam-bola no tadiavin’ny fitsarana, fa tsy misy lasibatra amin’ny firehana politika.
Nitondra ny heviny ihany koa ny lehiben’ny Faritra Sofia, Irénée Djaosera. Nambarany fa zava-dehibe tsy tokony hijabajabahana ny fiandrianam-pirenena. Mila fanavaozana ifotony i Madagasikara. Ny solombavambahoaka voafidy tany Ifanadiana, Manantena Hajanirina Dinah, kosa nilaza fa ireny no porofo fa mbola tsy mahaleo tena i Madagasikara. Misy ady mafy tsy hita maso sy tsy azontsika an-tsaina atrehin’ny Filoham-panjakana. “Tsy azo hodian-tsy hita fa tsy mipetra-potsiny ny fitondrana teo aloha sady tsy maty voalavo an-kibo. Izao no ahitana izay tena tia tanindrazana”, hoy izy.
R. Nd.
French