“Soratra velo-maharitra sa soratra velona mandrakizay?”. Io ny lohahevitra iompanan’ny adihevitra literera, hotontosaina anio amin’ny 2 ora, etsy amin’ny Tranombokim-pirenena Anosy, Efitrano Dox. Ny Faribolan’ny poeta sy mpanoratra Sandratra no mikarakara ny fotoana. Hitarika ny adihevitra kosa i Sy sy i Liantsoa. Ny voalohany, mpanao gazety, mpanoratra ary mpanabe an-tserasera; anisan’ireo tsy misorona miteny sy manitsy ireo mandiso tsipelina na fitsipika amin’ny fanoratana ny teny malagasy anaty tambajotran-tserasera i Sy. Mpanentana fandaharana mampianatra sy manoro ny fampiasana araka ny tokony ho izy ny teny malagasy ihany koa izy. Poeta, mpanoratra ary iray amin’ireo mpikambana mavitrika ao amin’ny Faribolana Sandratra kosa i Liantsoa. Samy milomano anatin’ny fikirakirana ny teny malagasy, araka izany, ny mpitarika. Ny hevitra kosa, tera-bary, ka halalaka ny fandraisam-pitenenana mandritra izany. Raha misy ny tsy fitoviam-pijery, harena ihany koa izany. Vao mainka aza manaporofo ny maha teny miaina ny teny malagasy. Manampy ireo hetsika marobe ho fanandratra ny teny malagasy ity adihevitra ity, mba tsy hifarana niaraka tamin’ny iray volana fankalazana isan-taona izany.
Zo ny Aina
French