Anio no hanamarika ny faha-20 taona nitantanany ny Fikambanan’ny mpikabary malagasy maneran-tany (Fi. Mpi.Ma) Andriamboavonjy Hanitriniaina Ravaomalala. Amin’ny alalan’ny hetsika « Tafasirim-pifaliana », hotanterahina ao amin’ny efitrano Dox, tranombokim-pirenena Ampefiloha. Izy no vehivavy voalohany nitondra ity fikambanana zokiny indrindra amin’ ny fikajiana sy fampivelarana ny tontolon’ny kabary ity.
Ao anatin’ny fampahafantarana ny « Tafasirim-pifaliana » no nametrahan’ny komity mpikarakara fa omena lanja lehibe, anio, ny « tsiaro ny vita, fampitana fanilo, fitodihana an-tseranana ». Manamafy izany ny: « Nanohy, nanatsara, niroso hatrany hatrany… Eto kosa isika no hamarana izany ».
Nandritra ny 20 taona nitantanan’Andriamboavonjy Hanitriniaina ny Fi.Mpi.Ma no nahitana fivelarana lehibe teo amin’ity fikambanana ity, raha jerena amin’ny isan’ny sampana na rantsana vao niorina eto an-toerana sy any ivelany. Tahaka izany ihany koa ireo hetsika notanterahina. Nofidiany manokana hanafana ity hetsika «Tafasirim-pifaliana» ity ny Zanabaliha sy ny feom-balihan’ireo tanora mandrafitra azy.
Marihina fa ny 27 jolay ka hatramin’ny 2 aogositra izao no hanatanterahina ny «Zaikabe» Fi.Mpi.Ma, any Mahajanga. Fotoana hanatontosana ihany koa ireo fifidianana izay hitantana ny isan’ambaratonga ho an’ity fikambanana ity.
HaRy Razafindrakoto
French