Hampiroborobo ny vokatra eto an-toerana, mitady tsena vaovao, hampitombo ny vokatra aondrana ary manararaotra ireo tombontsoa eo amin’ ny tsena afrikanina sy iraisam-pirenena. Ireo no tanjona napetraka nandritra ny Foire économique Vak’ranty natao ny 13 ka hatramin’ny 16 aogisitra teo, tao Antsirabe. Nandritra ny roa andro, nifanakalo hevitra tamin’ireo mpisehatra ara-toekarena sy namelabelatra ny soa fanararaotra amin’ny tsena afrikanina ny ekipan’ny minisiteran’ny Varotra sy ny fanjifana sy ny PA Zlecaf. Nivoitra tao anatin’izay ny fampahafantarana ireo tombontsoa sy fanamby ateraky ny Zlecaf. Nifantoka tamin’ny fahafahana ara-barotra azon’ny Malagasy mpandraharaha araraotina, indrindra ny paikady ilaina hahafahan’ ny vokatra eto an-toerana miditra sy mifaninana amin’ny tsena afrikanina. Ankoatra izay, nisongadina nandritra ny famelabelaran-kevitra ny momba ny tsena afrikanina sy iraisam-pirenena. Lohahevitra noresahina ny fampiroboroboana sy fampifandraisana ireo hery sy fahafahana ara-toekarena ananan’i Madagasikara eo amin’ny tsenan’ny Zlecaf sy ireo tsena iraisam-pirenena hafa. Marihina fa sehatra lehibe hanitarana ny tsena ho an’ny Malagasy ny vokatra ny Zlecaf. Mitohy ny ezaka ataon’ny minisitera sy ireo mpiara-miombon’antoka samihafa hanohanana ireo mpandraharaha mba hahafahany misitraka bebe kokoa ireo fahafahana ara-barotra.
Henintsoa
French